Omsendbrief 10/2008                                                                      13 Februarie 2008

Geagte Ouers

ONDERWYS MET ‘N ANGEL

Dit is ‘n bekende opvoedkundige feit dat leer vinniger plaasvind indien meer as een sintuig ingespan word.  Hoe meer sintuie dus by die leerproses betrek kan word, hoe vinniger vind leer plaas.  Met hierdie feit in gedagte en ook omdat die tegnologie al hoe meer verbruikersvriendelik word, het die onderwysers van Laerskool Durbanville dit vanjaar vir hulle ten doel gestel om t.o.v. hulle didaktiese benadering al hoe meer van tegnologie gebruik te maak om ook die oordrag van kennis so aan te bied dat dit tot alle leerstyle spreek.

Ons het reeds met ons Dur Bee SMS gedateer 1 Februarie 2008 aan u deurgegee dat die tema van die jaar die volgende is;  “Onderwys met ‘n Angel”. 

Onderwysers het reeds die afgelope jaar of twee met die interaktiewe witbord geëksperimenteer en ‘n hele aantal kollegas is reeds met hierdie tegnologie bekend.  Tans is hul besig om PowerPoint-opleiding te ontvang en is daar ook heelwat kollegas op die personeel wat reeds hierdie tegnologie onder die knie het.  Die doel is dus om die nuutste tegnologie (rekenaar in die klaskamer, plasmaskerms teen die mure, ens.) aan te wend om werklik die lewe daarbuite tot binne-in die klaskamer te bring.  Onderwysers wend reeds die rekenaar in die klaskamer baie effektief aan, maar ondervind tans ‘n probleem om video’s (die visuele impak daarvan) asook ander leermateriaal van die internet, tot hulle volle reg te laat kom.  Dit spreek tog vanself dat dit die ideaal is om liefs vir leerders ‘n video te wys van hoe ‘n vuurspuwende berg uitbars as om hul daarvan te vertel.  Ook wil ons u verseker dat hierdie nuwe benadering nie net ‘n nuwe foefie gaan wees nie en dat dit ook geensins verabsoluteer gaan word nie, maar dat dit ‘n hulpmiddel sal wees soos wat die oorhoofse projektor en die skryfbord en wandmateriaal in die verlede was.  Ons moet egter aanbeweeg met die tyd en ons glo dat hierdie nuutste tegnologie ook tot voordeel van elke leerder in die klaskamer sal wees. 

Ons neem dus die vrymoedigheid om enige ouer of instansie wat bereid sal wees om d.m.v. hulp en/of ‘n borgskap ons behulpsaam te wees om die nuutste tegnologie te bekom, te vra om die onderstaande afskeurstrokie te voltooi sodat die Beheerliggaam aksies kan fasiliteer.  Sien asseblief die afskeurstrokie.  Die Beheerliggaam en die Durbie Aksie 2008 het reeds geld gestem om hierdie nuutste projek van stapel te stuur, maar as ons dit in elke klaskamer wil implementeer i.p.v. slegs by sekere werkstasies, het ons natuurlik die kapitaal daarvoor nodig.

Huurkoop van rekenaars

Om bogenoemde behoefte gedeeltelik aan te spreek, het die Beheerliggaam reeds toestemming verleen (BL-vergadering 4 Februarie 2008) dat ‘n huurkoopooreenkoms aangegaan kan word om 34 nuwe rekenaars aan te koop.    

Insette soos hierbo gevra, sal bydra dat hierdie projek ten volle aangespreek kan word.  Soos reeds aan u deurgegee, moet ons met die huidige begroting die enorme probleem van kragvoorsiening aan die skool aanspreek.

Ons glo dat ons op die gemeenskap sal kan staatmaak om ons in hierdie nuutste projek te ondersteun, omdat dit werklik tot voordeel van elke leerder en toekomstige leerders aan die Laerskool Durbanville sal wees.

Durbanville-groete

J.C. Swart

SKOOLHOOF

ONDERWYS MET ‘N ANGEL

1.                  Ek, mnr./mev. ……….……………………………………………, ouer/voog van van ………………………………………. in Gr. …….….., is bereid om d.m.v. my kundigheid en/of finansiële bydrae ‘n bydrae tot bogenoemde projek te lewer. 

2.                  Ek is bereid om ‘n inligtingsvergadering insake “Onderwys met ‘n Angel” by te woon / sien nie my weg oop om sodanige vergadering by te woon nie. (Onderstreep asseblief wat op u van toepassing is.)