Omsendbrief 10

Omsendbrief 10/2010                                                                                         11 Februarie 2010

Geagte Ouer/Voog

WERKVERSLAE

In die toekoms sal alle werkverslae as ‘n rekenaardrukstuk aan u as ouers gestuur word.  Die Laerskool Durbanville het na die rekenaarstelsel oorgeskakel ter wille van effektiwiteit en die konsolidering van data in die skool.

Detensie sal ook dienooreenkomstig deur die rekenaarstelsel bepaal word en u sal, soos in die verlede, skriftelik in kennis gestel word indien u kind detensie op ‘n spesifieke Vrydag moet bywoon.

Wanneer ‘n leerder by die Laerskool Durbanville inskryf, onderteken hy/sy en sy/haar ouers die gedragskode van die skool.  Die nuwe gerekenariseerde werkverslagsisteem sal, soos in die verlede, streng volgens die huidige gedragskode van die skool toegepas word.  Die enigste verskil is dat punte nou aan oortredings toegeken word.  Die punt vir ‘n oortreding wissel volgens die graad van die oortreding, d.w.s. van minder ernstig tot baie ernstig.  Die puntetoekenning sal wissel van 2 punte vir minder ernstige oortredings tot 12 punte vir ‘n baie ernstige oortreding.  Sien asseblief die aangehegte lys van oortredings soos bepaal deur die gedragskode van die skool met die puntetoekenning toegeken aan die verskillende oortredings.  ‘n Leerder sal op detensie geplaas word na 6 punte aan hom/haar toegeken is, d.w.s. na 3 oortredings, soos in die verlede.

Indien u kind ‘n oortreding begaan, sal u ‘n gedrukte werkverslag vir die spesifieke oortreding ontvang, wat u en u kind moet onderteken.  Dit moet die volgende dag aan die klasonderwyser terugbesorg word vir liassering.

Hierdie sisteem moet asseblief nie alleenlik as ‘n strafstelsel beskou word nie, maar as ‘n sisteem wat moet lei tot korrektiewe aksie, selfdissipline en begeleiding deur u as ouer en die personeel.

Dit moet ook in gedagte gehou word dat die oorgrote meerderheid van die leerders deur ‘n gegewe akademiese jaar gaan sonder dat hulle een keer op detensie geplaas word.

Ons versoek dat alle ouers die toepassing van die dissiplinêre sisteem tot voordeel van u kind en die skool sal ondersteun.

Vriendelik die uwe

C.J. Fourie                                                        J.C. Swart

ADJUNKHOOF                                                  SKOOLHOOF